Hoyvík verður triðstørsta valstað í landinum

Eftir seinasta løgtingsval bleiv gjørt av, at eitt nýtt valstað skuldi verða í Hoyvík. Tað eru tað fleiri orsøkir til, sigur Jóan Petur Hentze, formaður í valnevndini í Tórshavnar kommunu.

Eitt valstað afturat merkir, at tað verður brúk fyri meira fólki til at telja upp, men ein partur av teimum kann takast frá høllini á Hálsi.

Formaðurin í valnevndini stúrir ikki fyri, at endaliga valúrslitið fyri Tórshavnar kommunu verður serliga nógv seinkað av, at eitt stórt valstað er komið afturat.

Næstan 3.300 veljarar skulu velja í Hoyvíkshøllini týsdagin. Harvið verður Hoyvík triðstørsta valstað í landinum aftaná høllina á Hálsi og høllina í Klaksvík. Gott og væl 10.600 fólk skulu velja í høllini á Hálsi.