Hátíðarhildu nýggja hádeild

Býráðið samtykti í februar í 2022, at skúlatilboðið í Sankta Frans skúla skuldi víðkast, og hálvan august í ár kundu so 88 næmingar byrja har.

Nýggi bygningurin hevur seks skúlastovur, eina nýmótans alis- og evnafrøðisstovu og eitt samantvinnað bókasavn og felagsøki, umframt tvey bólkarúm, serrúm til Gigni, Rásina og til bólkaarbeiði.

Heiðrikur á Heygum er í ferð við at listprýða miðhølið í skúlanum við søguni um Guttorm í Múla, skrivar heimasíðan hjá Tórshavnar kommunu.

Pláss er fyri 150 næmingum og 12-14 starvsfólkum í nýggju hølunum, ið gera, at nú slepst undan, at næmingar í Sankta Frans skúla skulu leita sær eftir øðrum skúla, tá ið teir eru lidnir við 7. flokk.