Elsa Berg ætlar sær at vera borgarstjóri

Nógv valevni eru savnað í høllini á Hálsi, og prátað verður dúgliga um møguligt samstarv í býráðnum í Havn. Støddin á bunkunum er so nøkulunda til at gjøgnumskoða, og ein, sum sær út til at hava eitt gott val, er Elsa Berg, sum fleiri vilja hava orðið á.

Spurd, um hon fer eftir borgarstjórasessinum, sigur Elsa, at tað ætlar hon sær, um møguleikin býðst.

Enn eru tey tó ikki liðug at telja í Hoyvík og á Argjum, so enn vanta heilt fitt av atkvøðum at verða taldar. 

Elsa hevur fingið fleiri enn 650 atkvøður á Hálsi, og eftir bunkunum at døma hevur hon fingið fleiri enn 150 atkvøður í Hoyvík.