Einki nýtt um sendistovuna í Moskva

Tað verður ikki í bræði, at føroyska sendistovan í Moskva letur uppaftur.

Hon er ómannað. Og útlit eru ikki fyri, at virksemið verður tikið uppaftur í bræði. 

Tað hevur fíggjarnevndin fingið at vita frá Uttanríkis- og Vinnumálaráðnum.

Ráðið sigur, at sendistovurnar verða alsamt eftirmettar. 

Um nýggjar sendistovur sigur ráðið, at hóast møguligar nýggjar sendistovur av og á vera umrøddar, til dømis í Grønlandi og í Noregi, so eru hesar ætlanir ikki ítøkiligar.

Í uppskotinum um fíggjarlóg fyri 2025 eru 37 milliónir krónur til tær átta sendistovurnar.