HM-svimjararnir eru tiknir út

Elisabeth Erlendsdóttir, Lea Osberg Højsted, Isak Brisenfeldt og Líggjas Joensen skulu umboða Føroyar í HM á stuttgeil í desember

HM á stuttgeil verður í Duna Arena í Budapest

Símun Christian Olsen

18.11.2024 - 08:25

Starvsnevndin hjá Svimjisambandi Føroya hevur tikið fýra svimjarar út til heimsmeistaraheitini á stuttgeil, sum verður í Budapest í Ungarn 10. - 15. desember.

Elisabeth Erlendsdóttir, Lea Osberg Højsted, Isak Brisenfeldt og Líggjas Joensen skulu umboða Føroyar.

Líggjas Joensen, sum síðan í summar hevur svomið við Aalborg Svømmeklub, er hin einasti, sum hevur klárað HM-kravtíðina.

Eitt av málunum er at koma millum tey bestu 32 í liðsvimjingini, tí hetta er týðandi krav í nýggju úrvalsskipanini hjá ÍSF, sum stuðlar føroyskum ítróttafólkum.

Líggjas Joensen og Lea Osberg Højsted vórðu um vikuskiftið kosin til ársins svimjarar av íðkaranevndini hjá SSF. Tey eru bæði fødd í 2008.