Varðin á Tvøroyri framvegis góðkendur

Virksemið hjá Varðanum Pelagic á Tvøroyri hevur fingið nýggja umhvørvisgóðkenning frá Umhvørvisstovuni.

Varðin Pelagic hevur fingið góðkenning bæði sambært havumhvørvisverndarlógini og umhvørvisverndarlógini.

Umhvørvisstovan hevur góðkent ætlanina hjá Varðanum Pelagic at gera fiskaprotein og lýsi.

Við støði í umhvørvisárinsmetingini hjá Varðanum metir Umhvørvisstovan ikki, at sjáldsom náttúra á sjónum, á botni ella fram við strondini fer fyri skeytið, at útlát av spillivatni fer at hava skaðilig árin á fjørðin ella at roykur, óljóð ella annað fara at vera til munandi ampa ella skaða fyri umhvørvið á sjónum ella fram við strondini. 

Kanska fer útbyggingin at ávirka nakað rekreativ virði, fríløtuvirði, niðri við fjøruna eystan fyri virkið.

Men Umhvørvisstovan heldur, at tá útfyllingin verður flutt út frá fjøruni, og spillvatnsleiðingarnar, sum nú ávirka økið, vera førdar longur út, minka hesa ávirkan.

Kann kærast

Avgerðin um góðkenningina kann kærast til landsstýriskvinnuna í umhvørvismálum í seinasta lagi 23. desember.

Náttúrufriðingarnevndin í Suðuroyar sýslu viðger av nýggjum byggingina hjá Varðanum í Tvøroyri.

Varðin Pelagic og Tvøroyrar kommunu hava biðið um at fáa málið úr aftur Yvirfriðingarnevndini og hava biðið náttúrufriðingarnevndina viðgera tað av nýggjum.

Tann viðgerðin er ikki liðug enn.

Tá náttúrufriðingarnevndin í Suðuroyar sýslu er liðug, fer málið aftur í Yvirfriðingarnevndina.