Suðurkorea: Andstøðan vil hava ríkisrættarmál reist móti forsetanum

Suðurkoreanski forsetin er illa kroystur í løtuni.

Seks suðurkoreanskir andstøðuflokkar vilja, at ríkisrættarmál verður reist ímóti Yoon forseta, eftir at hann lýsti serliga undantaksstøðu í landinum í gjár.

Alt bendir á, leggur forsetin ikki frá sær, verður ríkisrættarmál reist ímóti honum.

Uppskot til samtyktar er lagt fram av andstøðuni, og tjóðartingið kann møguliga longu atkvøða um tað í morgin.

Suðurkorea, andstøða í Suðurkorea

Andstøðutinglimir við skeltum uttan fyri tjóðartingið, har kravt verður, at forsetin leggur frá sær. (Mynd: Reuters/Ritzau Scanpix)

Tað upplýsa umboð fyri andstøðuflokkarnar á tíðindafundi, sambært AFP-tíðindastovuni.

Tað var í gjár, at Suðurkoreanski forsetin, Yoon Suk-yeol, lýsti eina serliga undantaksstøðu í landinum, tí hann vil verja tað ímóti “kommunistiskari hermegi”.

Samstundis leggur forsetin politisku andstøðuna í Suðurkorea undir at hava samhug við kommunistiska einaræðinum í grannalandinum Norðurkorea.

Nakrar tímar seinni samtykti ein meiriluti í tjóðartinginum at seta úr gildi undantaksstøðuna.