Netanyahu í rættinum í revsimáli um mutur

Ísraelski forsætisráðharrin, Benjamin Netanyahu, møtti í morgun í rættinum í Tel Aviv, har hann skal koma við síni frágreiðing í málinum um mutur og svik.

Netanyahu er fyrsti sitandi forsætisráðharri í Ísrael, sum er ákærdur í einum revsimáli.

Málið byrjaði í 2020, og snýr seg um, at Netanyahu í trimum førum m.a. skal hava boðið blaðeigarum góðar avtalur afturfyri jaliga umrøðu í miðlunum.

Forsætisráðharrin vísir øllum ákærum aftur. 

Benjamin Netanyahu í rættinum

(Mynd: Reuters/Ritzau Scanpix)

Eitt lágmark

Men at hann skal møta í rættinum og geva frágreiðing í einum máli um mutur og svik, verður umrøtt sum eitt lágmark í drúgvu politisku starvsleið hansara.

Hann kann verða dømdur upp í 10 ára fongsul.

Sambært ísraelskari lóg, kann Netanyahu vera sitandi sum forsætisráðharri, hóast hann er ákærdur. 

Men verður hann funnin sekur, noyðist hann leggja frá sær. 

Mett verður, at tað ganga fleiri mánaðir, áðrenn dómur fellur í málinum.