Hesi tølini eru so umráðandi, at eg mátti halda fram

Tað var til tíðir einsligt, tí hon var tann einasta, sum sat og skrásetti krabbameinstilburðir í Føroyum, og tí gleddi Sæunn Ólavsdóttir Hansen seg til, tá hon einaferð um árið fór til Danmarkar at arbeiða saman við dønum innan sama øki.

Hetta er eisini eitt arbeiði, sum krevur nærlagni og frið, so Sæunn sat sum oftast við skránni heima við hús, tí á sjúkrahúsinum, har hon annars arbeiddi sum leiðslufulltrúi, leiðandi læknaskrivari og útbúgvingarleiðari á medisinska deplinum, var trupult at hugsavna seg.

- Hagtølini eru so umráðandi fyri gransking í Føroyum, tí at um ein granskari hevur brúk fyri hesum tølunum, so skulu tey ikki sjálvi fáa tølini til vega, men finna tey í skránni, sigur Sæunn um arbeiðið hon hevur gjørt í 30 ár.

Nú hevur Heilsustýrið fingið uppgávuna, og Sæunn er fegin um at arbeiðið heldur fram í føstum kørmum og við fólkum, sum hon sjálv hevur lært upp.