Fleiri børn í Føroyum fáa Wegovy

Tilsamans hava 18 børn og ung undir 18 ár í Føroyum fingið klænkiheilivágin Wegovy síðani 2024.

Í 2024 vóru tey níggju í tali, í 2025 ellivu, og higartil í ár hava tólv børn og ung fingið heilivágin.

– Hetta er eitt tekin um, at vit hava ein trupulleika við barnafiti í Føroyum, sigur Rúna Olsen, barnalækni í Sjúkrahúsverkinum.

Wegovy kann verða givið ungum frá 12 ára aldri undir ávísum treytum. Men heilivágurin er ikki uttan vansar, og óvissa er framvegis um langtíðarárinini hjá børnum, sum byrja við viðgerðini ung.

Rúna Olsen heldur tí, at vit eiga at vera varin við at geva børnum klænkiheilivág, og at slík viðgerð eigur at liggja hjá Barnadeildini í Sjúkrahúsverkinum.

Hon leggur dent á, at klænkiheilivágur ikki eigur at vera ein skjót loysn á barnafiti.

Heldur eiga vit at kanna, hví børn gerast ov feit, og hvørja hjálp tey hava tørv á.

Sambært Rúnu Olsen er fyribyrging fremsti vegurin at basa trupulleikanum við barnafiti í Føroyum.