Ísrael og Libanon leingja vápnahvíldina

Libanon og Ísrael eru samd um at leingja avtaluna um vápnahvíld til 18. februar, siga Hvítu húsini. 

Londini skulu eisini býta um fangar.

Fangabýtið fevnir um libanesarar, sum eru tiknir til fanga, eftir at ósemjan millum Ísrael og Hezbollah-bólkin, sum fær stuðul úr Iran, herdist eftir Hamas-álopið á Ísrael 7. oktober 2023.

Sambært avtaluni um vápnahvíld, sum varð undirskrivað seint í november, skuldu ísraelskar deildir taka seg aftur úr Suðurlibanon í seinasta lagi í gjár, men Ísrael boðaði longu fyrr í hesi vikuni frá, at tað megnar ikki at halda evstamarkið.

Libanski forsætisráðharrin, Najib Mikati, váttaði í nátt, at landið fer framhaldandi at halda vápnahvíldina.

Í gjár var uppaftur størri óvissa um vápnahvíldina, eftir at libanskir myndugleikar søgdu, at ísraelskar deildir høvdu dripið 22 fólk, og 120 vóru særd.