Deep Seek bannað í Italia

Kinesiska vitlíkistænastan Deep Seek er nú bannað í Italia. 

Tað skrivar Politico.eu. 

Tað hendir eftir boðum frá italska Dátueftirlitinum, sum hevur givið fyritøkunum, sum hava ment Deep Seek, Hangzhou DeepSeek Artificial Intelligence og Beijing DeepSeek Artificial Intelligence, boð um at gevast at brúka upplýsingar hjá italskum borgarum alt fyri eitt. 

Sambært Politico hendi tað eftir, at kinesisku fyritøkurnar sýttu fyri at samstarva við italsku myndugleikarnar. 

- Í mótsetning til tað, sum myndugleikarnir hava staðfest, upplýsa fyritøkurnar, at tey ikki virka í Italia og at evropeisk lóggáva tí ikki geldur fyri tey, sigur italska Dátueftirlitið. 

Eitt svar, sum sambært italska Dátueftirlitinum, ikki kann góðtakast. 

ChatGPT somu lagnu
Hetta er ikki fyrstu ferð, at italskir myndugleikar fara í hernað móti vitlíki.

Eisini ChatGPT bleiv í fyrstu atløgu bannað í 2023, tá fyritøkan OpenAI ikki vilda eftirlíka krøvum frá myndugleikunum. 

Eftir at fyritøkan eftirlíkaðum krøvunum slapp hon aftur at virka í Italia.

DeepSeek er kinesiska svarið uppá vitlíkistænastur so sum ChatGPT, og tað serliga við DeepSeek er, at tað hevur verið ógvuliga bíligt at menna.