Útlendingar fáa ikki eftirlønina sum løn

Tá ið útlendingar, sum arbeiða í Føroyum, fáa alla eftirlønina í einum, tá ið teir fara úr Føroyum, í staðin fyri sum løn, so hvørt teir fáa løn, kann tað gera, at teir ikki velja sær arbeiði í Føroyum.

Tað sigur Føroya arbeiðsgevarafelag í hoyringarskrivi um uppskotið um broyting í eftirlønarlógini.

Uppskotið er um at strika møguleikan hjá útlendingum at fáa eftirlønina sum løn.

Í staðin mælir landsstýrið til, at fólk fáa samansparingina, tá tey fara av landinum aftur, og ikki hava verið í Føroyum í meira enn 60 mánaðir.

Í kanning hevur arbeiðsgevarafelagið víst á, at starvsfólkatørvurin á summum økjum í privatu vinnuni er stórur.

Tørvur á 700-850 fólkum 

Um fáa ár kunnu vit vænta at skula brúka 700 til 850 fleiri fólk, serliga fólk við yrkisútbúgvingum og KT-førleikum.

Avleiðingin av uppskotinum um eftirlønina, kann gerast, at starvsfólkatrotið í privatu vinnuni verður størri, sigur arbeiðsgevarafelagið.

Felagið sigur, at tið útlendingar skulu velja millum størv í Føroyum ella uttanlands, leggja teir stóran dent á nettolønina.

Við broytingini, sum landsstýrið ætlar at gera, fáa fólk nógv minni í løn, tí eftirlønin ikki regluliga kann roknast um til løn.