Ákæruvaldið kært fyri ikki at fara í rættin við máli um tvígiftu

Málið um tvígiftu, bigami, er ikki liðugt enn.

Ákæruvaldið hevur fingið eina kæru um avgerðina ikki at fara í rættin við málinum.

Málið verður tí sent statsadvokatinum.

Hann kann biðja ákæruvaldið gera fleiri kanningar í málinum, ella viðgera støðutakanina av nýggjum.

Tók málið aftur

Ákæruvaldið tók málið um tvígiftu, sum í september í fjør var sett á rættarlistan, aftur.

Nýggj skjøl stuðla uppáhaldinum um, at konan ikki var gift, tá hon var gift uppaftur.

Ákæran segði, at ein 39 ára gomul kvinna var sek í tvígiftu.

Hon var ákærd fyri at hava gift seg við einum føroyingi, hóast hon longu var gift í heimlandi sínum í Asia. 

Hetta var í 2012.

Málið skuldi viðgerast í Føroya Rætti í september í fjør.

Men verjin bað um at fáa tað útsett. 

Málið var útsett í tríggjar mánaðir.

Kundi ikki prógvast

Málið er mett av nýggjum, og við nýggju skjølunum kann ákæruvaldið ikki prógva, at kvinnan er sek í tvígiftu, segði Katrin Thorsvig Hansen, ákæri, 20. januar. 

Ákæran var tí tikin aftur.

Men tann avgerðin er kærd.