Landsliðsvenjarin kunngjørdur í morgin

Fyrrapartin í morgin fer Fótbóltssamband Føroya at kunngera, hvør verður landsliðsvenjari hjá A-landsliðnum við monnum næstu árini.

FSF hevur boðið til tíðindafund klokkan 11.00. 

In.fo skrivar í dag, at komið er á mál við sonevndu føroysku loysnini. Eyðun Klakstein verður høvuðsvenjari og Atli Gregersen hjálparvenjari. Teir báðir stóðu á odda fyri tveimum teimum seinastu dystunum hjá føroysku monnunum í fjør. Føroyar vunnu á Armenia í tí fyrra.

Ivi hevur verið um støðuna hjá Atla Gregersen, sum framvegis spælir við besta liðnum hjá Víkingi. Føroyskir miðlar hava skrivað, at tað var ein møguligur snávingarsteinur, men nú bendir nógv á, at ein loysn er funnin.