Endaliga niðurstøðan kemur um nakrar dagar

Landsstýrismálanevndin hevði í dag fund um kæruna av Dennisi Holm, landsstýrismanni, sum er kærdur fyri at hava útlutað 32.500 tons av svartkjafti av órøttum.

Nevndin kom herfyri til eina fyribils niðurstøðu, út frá einum tilmæli frá Kristinu Samuelsen, advokati.

Fyribils niðurstøðan varð send  22. januar til viðmerkingar.

Dennis Holm fekk longda svarfreist, og hann hevur nú svarað.

Hans Jacob Thomsen, formaður í landsstýrismálanevndini, sigur, at nevndin saman við Kristinu Samuelsen í dag viðgjørdi svarið. Men enn fyriliggur ikki nøkur endalig niðurstøða. Hon kemur um nakrar dagar, sigur Hans Jacob Thomsen.

Málið hevur verið drúgt, tí tað var  5. mai í fjør, at Árni Skaale kærdi Dennis Holm til landsstýrismálanevndina.

Tað eru skjótt tíggju mánaðir síðan.