PKK boðar frá vápnahvíld

Turkiski yvirgangsbólkurin, PKK, boðaði um vikuskiftið frá vápnahvíld við Turkaland. 

Tað skrivar bretska kringvarpið. 

Fráboðanin kemur eftir, at PKK-leiðarin, Abduallah Øcalan, hevur heitt á bólkin um at leggja vápnini og upploysa seg sjálvan. 

Í sambandi við fráboðanina um vápnahvíld hevur PKK heitt á Turkland at lata Øcalan leysan. Hann hevur verið í turkiskum fongsli síðan 1999.

PKK, sum er ein stytting fyri Kurdiska Arbeiðaflokkin, hevur verið í vápnaðum stríði móti turkisku stjórnini síðan 1984. Bólkurin er lýstur sum yvirgangsbólkur av Turkalandi, ES og USA.

Málið hjá bólkinum er at skipa ein kurdiskan stat í landnyrðingspartinum av Turkalandi. Umleið 20 prosent av teimum 85 millónum íbúgvunum í Turkalandi eru kurdar.

Mett verður, at umleið 40.000 fólk eru deyð í stríðnum millum turkisku stjórnina og PKK.