Vitin letur heiðurstekin á fjórða sinni

Eilif Samuelsen, Hans Andrias sølvará og Tróndur Patursson hava fingið heiðursmerki og heiðursbræv frá lags-felagsskapinum, sum eitur Vitin.

Ikki verður upplýst, hvør er í Vitanum ella, hvør hevur stovnað hann, men endamálið er at heiðra úrmælingar, sum hava framt vala avrik, ið eru við til at bera føroysku tjóðina framá.

Vitin er lagsfelagsskapur, sum fólk hava stovnað, tí tey ásanna, at brúk er fyri at heiðra úrmælingar, sum í verki og við ósjálvsøkni hava framt óvanlig og góð avrik føroysku tjóðini at gagni.
 

Grundgevingin fyri at heiðra Eilif Samuelsen er:

Tú hevur í tínum drúgva arbeiðslívi sum týðari, lítillátin og við neyvum arbeiðslagi, sakliga og hegnisliga flutt klassiskar heimsbókmentir í snøggan føroyskan málbúna; stillisliga stimbrað og kveikt áhuga millum manna fyri heimsbókmentum okkum øllum til gleði og gagns. Tú ert ein oddviti og ein fyrimynd.

Grundgevingin fyri at heiðra Trónd Patursson er:

Tú hevur alla tína yrkisleið við neyvum arbeiðslagi og makaleysa, frumrunna listarliga virki sett Føroyar á listarliga heimskortið.

Tini listaverk hava brotið upp úr nýggjum, tá tað ræður um málningalist, glaslist, innsetingarlist v.m., og hava víðkað okkara sjálvsfatan og alheimsliga sjónarringin.

Tú ert ein oddviti og ein fyrimynd.

Grundgevingin fyri at heiðra Hans Andrias Sølvará er:

Tú hevur í tíni yrkistíð, við neyvum arbeiðslagi, sinniliga og sakliga givið íkast til almenna orðaskiftið.

Við tínum ritverkum og greinum hevur tú bøtt um samtíðarsøguligu kjakmentanina og gjørt títt til at flyta próvførsluna frá tí frásøguliga til tað sannpróvliga; okkum øllum og komandi ættarliðum til gleði og gagns.

Tú ert ein oddviti og ein fyrimynd.

Heiðursmerkið er silvur- ella gulllagt bringuprýði, sum er krossur við oyggjunum í miðjuni og áskriftini ”pro aris et focis” í bogaðum teksti omanfyri, - sum merkir 'stríð fyri altar og grúgvu, fyri hús og heim'.