Stór mótmæli í Istanbul

Stórar mótmælisgongur eru í Istanbul í dag, tí ein turkiskur dómstólur hevur gjørt av, at borgarstjórin í Istanbul, Ekrem Imamoglu, skal sita varðhaldsfongslaður til rættarmálið móti honum byrjar, har hann er ákærdur fyri mutur og fyri at stuðla yvirgangsfelagsskapinum, PKK.

Ekrem Imamoglu skal annars í dag veljast sum forsetavalevni fyri Republikanska fólkaflokkin, CHP, sum er í andstøðu til núverandi forsetan, Recep Tayyip Erdoğan. Ekrem Imamoglu verður sæddur sum ein av argastu mótstøðumonnunum hjá 
Recep Tayyip Erdoğan.

Ekrem Imamoglu noktar seg sekan í øllum ákærum og sigur, at ákærurnar eru politisk forfylging.

Sama sigur borgarstjórin í Ankara, sum eisini er limur í Republikanska fólkaflokkinum, CHP. Tað, sum hendir í løtuni er "skomm fyri rættarsamfelagið", sigur hann við Reuters tíðindastovuna.