Príshækkingarnar hjá SSL verða ikki útsettar

Tað eru lítið sannlíkt, at príshækkingarnar, sum Strandfaraskip Landsins hava lýst at koma í gildi týsdagin 8. apríl í ár, verða útsettar ella ikki koma í gildi. Tað sigur Jóhan Christiansen, landsstýrismaður við samferðslumálum í einari stuttari viðmerking, bara nakrar fáar dagar áðrenn prísbroytingarnar koma í gildi.

Hesar seinastu dagarnar hava fleiri fólk gjørt vart við prísbroytingarnar, serliga, tí at skotbráið var so stutt, nú nýggju prísirnir skulu setast í verk. Orsøkin til prísbroytingarnar er, at Strandfaraskip Landsins hava fingið góðar fimm milliónir krónur minni á fíggjarlógini, og tann peningurin skal so útvegast við hægri prísum. Men hóast landsstýrismaðurin skilir trupulleikan hjá eitt nú ferðavinnuni, so er í løtuni ikki nakað, sum ber á tað borðið, at nýggju prísirnir ikki koma í gildi týsdagin.