Kringvarpið vísir Eurovision Song Contest 2025 

Spenningurin til ársins útgávu av Eurovision-sangkappingini er eyka stórur millum føroyingar, tí í ár skal Sissal Jóhanna Norðberg Niclasen úr Havn umboða Danmark við sanginum "Hallucination".

Eftir samráðingar við bæði European Broadcasting Union (EBU) og DR hevur Kringvarpið fingið rættindini til at samsenda Eurovision Song Contest 2025 saman við DR.

Vit vísa báðar hálvfinalurnar ávikavist týskvøldið 13. mai og hóskvøldið 15. mai og síðani finaluna leygarkvøldið 17. mai. 

Størsta og elsta tónleikakapping

Eurovision-sangkappingin er størsta og elsta tónleikakapping í heiminum. Hon varð fyrstu ferð hildin í 1956. Íblásturin at skipa fyri kappingini kom frá italska Sanremo Music Festival, sum hevur verið hildin síðani 1951.

Sangkappingin verður í ár send beinleiðis úr Basel í Sveis við luttakarum úr í alt 37 londum. Frakland, Týskland, Italia, Spania og Bretland eiga fast pláss í finaluni, meðan hini 33 londini skulu royna at syngja seg til eitt av 20 finaluplássum í tveimum hálvfinalum. 

15 lond kappast um tey 10 finaluplássini í fyrru hálvfinaluni týskvøldið 13. mai, meðan 16 lond kappast um tey 10 plássini í seinnu hálvfinaluni, ið er hóskvøldið 15. mai. 

Sissal Jóhanna Norðberg Niclasen úr Havn, sum umboðar Danmark við sanginum "Hallucination", er í seinnu hálvfinaluni.  

 

 

 

 

View this post on Instagram

 

 

 

 

 

 

 

 

 

 

 

A post shared by Kringvarp Føroya (@kringvarp)

Per stendur fyri pallsetingini

Sissal Jóhanna er ikki einasti føroyingur í danska ferðaliðnum, sum í fyrstu atløgu skal royna at tryggja Danmark eitt, eftir hondini, rættiliga sjáldsamt finalupláss. 

Sjónvarpsframleiðarin Per Zachariasen er eisini við. Per stendur fyri pallsetingini hjá Sissal Jóhonnu.

Pallsetingin, ið Sissal Jóhanna Norðberg Niclasen vann danska Melodi Grand Prix við, fekk nógar ákoyringar. 

Føroyskt toymi sigur frá kappingini 

Umframt at Kringvarpið sendir frá bæði Eurovision hálvfinalunum og finaluni, so dekkar Kringvarpið eisini sangkappingina væl.  

Tvey starvsfólk úr Kringvarpinum leggja leiðina til Basel, tað eru Rúni Jákupsson, programmfólk, og Gestur Janusarson Lómstein, fotografur.

Teir tryggja, at føroyingar fáa feskastu tíðindini úr Basel við innsløgum og samrøðum í útvarpinum og sjónvarpinum og greinum á heimasíðu Kringvarpsins.  

Beinleiðis í sjónvarpinum og á heimasíðuni 

Øll trý kvøldini við Eurovision sendir Kringvarpið beinleiðis í sjónvarpinum. Eisini ber til hjá fólki, ið eru stødd í Føroyum, at stroyma á kvf.fo. 

- Fyrra hálvfinala: Týsdag 13. mai, kl. 20 
- Seinna hálvfinala: Hóskvøldið 15. mai kl. 20
- Finala: Leygarkvøldið 17. mai kl. 20

Gunnar Nolsøe verður frásøgufólk úr Sortudíki 

Føroyingar kunnu fylgja við øll trý Eurovision-kvøldini, meðan Gunnar Nolsøe sigur frá. Kringvarpið fær signal úr DR uttan danska viðmerkjaran. Tó verða danskir undirtekstir, tá ið tað verður tosað enskt í sendingini.