Kvinnurnar styrkismettar í triðju røð

Hósdagin 22. mai verður HM-lutakastið hjá kvinnulandsliðnum. Altjóða hondbóltssambandið, IHF, hevur kunngjørt styrkismetingina og Føroyar eru í triðju røð saman við Kekkia, Japan, Senegal, Ísland, Argentina, Suðurkorea og Tunesia. Hetta er fyrstu ferð nakrantíð, at Føroyar luttaka í einum HM-endaspælið fyri vaksin. HM-endaspælið verður spælt í Týsklandi og Niðurlondum í døgunum 26. novembur til 14. desembur 2025.

Tað er longu greitt, at Føroyar koma at spæla sínar heimadystir í týska býnum Trier. Hetta er eftir ynski frá týska hondbóltssambandinum. Um Føroyar gerðast millum trý tey bestu liðini í bólkinum, skulu Føroyar víðari til Dortmund at millumumfarið. Liðini, sum ikki koma víðari úr innleiðandi umfarinum, spæla sonevnda Presidents Cup í ‘S-Hertogenbosch um plássini frá nummar 25. til 32.

Styrkismetingin sær soleiðis út:

Styrkisbólkur 1: Frakland, Noreg, Danmark, Ungarn, Svøríki, Niðurlond, Týskland, Montenegro

Styrkisbólkur 2: Pólland, Brasil, Serbia, Rumenia, Sveis, Spania, Eysturríki, Angola

Styrkisbólkur 3: Kekkia, Japan, Senegal, Ísland, Argentina, Føroyar, Suðurkorea, Tunesia

Styrkisbólkur 4: Egyptaland, Uruguay, Kasakstan, Paraguei, Iran, Kuba, Kina, Kroatia