Stór íbúðarbygging í Saltangará er slept

Verkætlanin at byggja 180 íbúðir í Leitinum í Saltangará verður av ongum. Í hvussu er ikki við smápartafelagnum "Í Leitinum."

- Verkætlanin hongur ikki saman fíggjarliga, sigur Jóhannus Egholm Hansen, nevndarformann í St. Jørgen Ejendomme As.

Tað var í september 2021, at danska felagið, St. Jørgen Ejendomme As., sum føroyingar eiga, gjørdi avtalu við Runavíkar kommunu um at byggja íbúðir í stóru útstykkingini í Runavík. 

Talan var um størsta íbúðarhús í Føroyum, har 400-500 fólk skuldu búgva.

Johannus Egholm Hansen - Mynd: Sermitsiaq

Jóhannus Egholm Hansen. (Mynd: Sermitsiaq)

Broytt til 180 íbúðir

Í juni mánaði í fjør segði Joel undir Leitinum, nevndarformaður í smápartafelagnum í Leitinum, sum er dótturfelag hjá St. Jørgen Ejendomme As., at ætlanin tá var, at kommunan skuldi fáa tekningar og umsókn um byggiloyvi um stutta tíð. Men tað helt ikki. 

Upprunaliga var ætlanin at byggja 130-150 íbúðir, sum skuldu vera millum 60 og 167 fermetrar til víddar. 

Ætlanin varð seinni broytt, og íbúðirnar skuldu vera smærri, tilsamans umleið 180 íbúðir. Ætlanin var at byggja í fýra stigum, 

Joel Undir Leitinum hevur í dag onga viðmerking til málið. Hann vísir til Jóhannus Egholm Hansen.

Íbúðir í Leitinum, í Leitinum, Saltangará

Bjóða út av nýggjum

Tórbjørn Jacobsen, borgarstjóri í Runavíkar kommunu, sigur í dag við Kringvarpið, at kommuna fer nú at gera fyrireikararbeiðið , so at ætlanin kann bjóðast út av nýggjum.

Borgarstjórin í Runavík vil tó ikki gera bandaða samrøðu um málið.

Tórbjørn Jacobsen, Tobbi

Tórbjørn Jacobsen. 

Hann sigur, at upprunaliga vóru fleiri, sum høvdu áhuga at gera íbúðirnar í Leitinum. Hann hevur vón um, at onkur av teimum, ella onnur bjóða seg fram at gera íbúðirnar.

- Tað er marknaðurin, sum ger av, um íbúðarætlanin verður til veruleika, men vit vóna, at onkur vísir áhuga fyri ætlanini, sigur Tórbjørn Jacobsen. 

Hoyr innslag í útvarpstíðindunum: