Flogbóltskvinnurnar tveir dystir á heimavølli

Føroyska flogbóltslandsliðið við kvinnum tekur um vikuskiftið ímóti Norðurmakedónia og Eysturríki í Silver Leage.

Teir báðir dystirnir ímóti Norðurmakedónia fríggjakvøldið og Eysturríki sunnudagin verða spældir í høllini inni í Dal á Sandi.

Farna vikuskiftið spældu føroysku kvinnurnar fyrsta Silver League-umfarið ímóti Lettlandi og Ísrael í Lettlandi. Tað eydnaðist at vinna eitt sett ímóti lettum, har úrslitið gjørdist 3-1 til Lettland, meðan Føroyar taptu 3-0 ímóti Ísrael.

Norðurmakedónia vann 3-0 á Luksemborg, men varð smurt av 3-0 ímóti Sveis. Eysturríki, sum er niðurflytari úr Gullliguni, tapti 3-2 fyri Georgia og vann 3-0 á Íslandi í fyrsta umfari av Silvurliguni.

Silvurligan er triðbesta deildin fyri flogbóltslandslið. 10 tey bestu evropeisku liðini og átta tey bestu úr restini av heiminum spæla í Nations League. Síðan spæla tey næstbestu evropeisku liðini í Gulliguni, og restin hevur rætt til at spæla í silvurliguni um pláss í gullliguni.

Dystarætlan:

Fríggjadagin 6. juni kl. 19.00: Føroyar - Norðurmakedónia
Leygardagin 7. juni kl. 17.00: Eysturríki - Norðurmakedónia
Sunnudagin 8. juni kl. 17.00: Føroyar - Eysturríki