Samanstoytur á Hvítanesvegnum

Tað var tann stóri útrykningurin, tá tveir bilar rendu frontalt saman á Hvítanesivegnum, á strekkinum millum rundkoyringina niðanfyri Føroya Tele og Mannbrekku, stutt fyri klokkan átta í gjárkvøldið.

Tveir sjúkrabilar og tveir bilar frá sløkkiliðnum í Havn fóru á staðið saman við løgregluni, og tað sá einki unniligt út á staðnum, tí teir báðir bilarnir, sum høvdu rent saman, stóðu við umleið 100 metrum ímillum.

Tíbetur fekk eingin av teimum fýra, sum vóru í bilunum, trý í tí eina og eitt í hinum, nakran skaða av samanbrestinum, sum eftir bilunum at døma tykist hava verið rættiliga harður. Tey vóru, sum vanligt er í slíkum førum, koyrd á Landssjúkrahúsið til kanningar, men sambært vakthavandi á støðini í Havn, hava tey øll tað gott og eru útskrivað.

Ferðsluóhappið hendi stutt eftir rundkoyringina og sum skilst er orsøkin, at annar bilurin fór yvir um miðlinjuna og endaði, heilt ella lutvíst, í hinari breytini, og so brast.

Vakthavandi á løgreglustøðini í Havn fær ikki sagt so nógv annað enn akkurát tað, at tveir bilar rendu saman.

- Vit vita í løtuni ikki, hvør orsøkin til ferðsluóhappið var. Vit vita, at annar bilurin er farin yvir í hina breytina og at bilarnir rendu frontalt saman, og tað er alt sum vit fáa sagt í verandi løtu. Vit kanna málið í løtuni og tá gera vit ikki fleiri viðmerkingar til málið, sigur vakthavandi á støðini í Havn.

Annars hevði løgreglan lítið at gera hvítusunnuaftan. Lítið fólk var í býnum og náttin var stak friðarlig. Kortini fekk ein maður brót fyri brot á politiviðtøkurnar, tá hann ikki aktaði boð frá løgregluni.