Silvurligan: Flogbóltsmenninir vunnu á Íslandi

Føroyska flogbóltslandsliðið við monnum vann í gjárkvøldið 3-2 á Íslandi í sínum fyrsta dysti í Silvurliguni í ár.

Fyrsta umfarið hjá monnunum verður spælt í Íslandi.

Føroyar fingu flúgvandi byrjan við at vinna tvey tey fyrstu settini og vóru eisini á odda í triðja setti. Men Ísland vendi dystinum og javnaði til 2-2 í settum og legði seg eisini á odda 11-10 í javnbrótaranum. Føroyar vóru tó knáari seinastu bóltarnar og vunnu avgerandi settið 15-13.

Seinnapartin í dag spæla Føroyar aftur; hesa ferð ímóti Svøríki. Í kvøld spæla kvinnurnar hjá Føroyum ímóti Íslandi í Luksemborg, sum er vertur fyri triðja og seinasta umfarinum í Silvurliguni hjá kvinnum.