Í Danmark er óttin fyri russiskum hybridálopum vorðin til veruleika

Russar fyrireika atsóknir móti donskum fyritøkum og útbúna, og teir keypa sær hjálp frá vanligum dønum, sum tó ofta eru púra óvitandi um, hvønn teir í veruleikanum gera tænastur fyri.

Tað avdúkar Emil Græsholm, ovasti fyri mótnjósningini hjá donsku politi-fregnartænastuni, PET, í samrøðu við Berlingske Tidende. 

Sambært PET-ovastanum hava myndugleikarnir avdúkað ítøkiligar ætlanir hjá russum um at fremja atsóknir móti donskum fyritøkum, ið onkursvegna kunnu knýtast at donsku hernaðarhjálpini til Ukraina. 

Flemming Spidsboel, danskur granskari í altjóða viðurskiftum og russlandsserfrøðingur, sigur, at tað gerst alsamt meira vanligt í kriminellum umhvørvum, at roynt verður at rekruttera vanligar borgarar at gera kriminellar tænastur, og at tað er hesin framferðarháttur, vit nú síggja hjá Russland brúka.