Ungdómsløgting í februar

Ungdómsting verður tveir dagar fyrst í februar næsta ár.

Tað er 10. ferð næmingar í framhaldsdeildunum fáa møguleika at seta dagsskránna í løgtinginum. 

Innbjóðing til allar 8., 9. og 10. flokkar um at vera við er farin til allar skúlar. 

Tá ungdómsting var seinast, tað var í 2024, vóru sjey skúlar við. 

Tey 32 ungdómstingfólkini viðgjørdu tá 10 lógaruppskot og uppskot til samtyktar. 

Hetta vóru millum annað uppskot um  skúlaviðurskifti, revsilóg, barnafrádrátt, ungdómstilboð og tubakksvørur.

Endamálið við ungdómstinginum er eitt nú at læra næmingar at vera ein virknari partur í fólkaræðinum og geva teimum innlit í, hvør luturin hjá løgtinginum er í fólkaræðinum, skrivar løgtingið.