Hava bíðað hálvt ár eftir brekumboðnum

Meira enn eitt ár er liðið, síðani lógin um at seta brekumboð bleiv samtykt. Og tað er við at vera eitt hálvt ár síðani hon kom í gildi. Men enn er onki umboð sett.

- Tað er til eitt og hvørt tíðspunkt umráðandi, at mann útinnir lóggávu, sum er galdandi. At bíða í næstan eitt hávt ár við tí, tað er í sær sjálvum rættiliga álvarsamt, sigur Bárður Atlason Ísheim, aðalrskrivari í MEGD.

Tørvur á brekumboði

Eitt brekumboð skal hava eftirlit við, kunna, vegleiða og tryggja rættindum hjá teimum, ið bera brek og sjúku, í samstarv við ST sáttmálan.

Sambært Bárði Atlason Ísheim kann tað hava stórar avleiðingar, um eitt brekumboð ikki verður sett sum skjótast.

- Í tí dagliga hava fólk í okkara limafeløgum tørv á ymiskum tillagingum í gerandisdegnum. Um tær tillagingarnar ikki rigga, so eru tey kanska ikki við í samfelagnum, og verða sett uttanfyri. Tað er ikki virðiligt fyri tey sum menniskju. Tað er eisini meira skynsamt fíggjarliga at hugsa tey við, um tað endiliga skal koma an uppá tað, sigur Bárður Atlason Ísheim. 

Hoyr samrøðu við Bárð Atlason Ísheim: