NSÍ: Tað verður uttan Petur Knudsen

Tað er í kvøld klokkan 19.45, at NSÍ tekur móti kenda finska felagnum HJK Helsinki í 1. undanumfarinum í UEFA Conference League. Dysturin verður við Djúpumýru í Klaksvík. Venjarin hjá NSÍ, Jens Wedeborg, er vónríkur, men ásannar at gestirnir eru favorittar.

 - Hetta verður ein avbjóðing. Hetta eru tvey lið, sum spæla eins fótbólt, so tað verður ein spurningur um hvør spælir betri, sigur Jens Wedeborg.

Hann váttar, at Petur Knudsen er nakað frá at verða tøkur til dystirnar í Evropa. Landsliðsspælarin bleiv skaddur í venjingardystunum í Georgia fyrr í summar. Hann verður væntandi ikki at síggja aftur á vøllinum fyrr enn í august.

Fleiri sita uttanfyri

Petur Knudsen var annars á veg til júst HJK Helsinki í 2021, men hóast nógv varð skrivað um skiftið, so bleiv tað av ongum. NSÍ verður eisini uttan Betuel Hansen, Kevin Jablinski og Beinir Nolsøe.

 - Kevin spælir ikki aftur í ár. Vit vóna, at Betuel verður klárur aftur í septembur, meðan málið er at Beinir Nolsøe spælir returdystin í Helsinki. Hann hevur eina lítla fibur, sigur Jens Wedeborg.

HJK Helsinki hevur verið í Føroyum fyrr. Finska stórfelagið vann so seint sum í fjør á KÍ. Hetta eftir tveir javnar og spennandi dystir. HJK hevur eisini vunnið á bæði Víkingi og HB ávikavist 2018 og 2019,  meðan fyrsti dysturin í Føroyum var í 1994 móti B71 í UEFA Cup Winners' Cup.

 - Tað eru 11 móti 11, og tað eru tveir dystir. Vit síggja tað sum, at alt er møguligt, men vit skulu ikki verða bláoygdir og leypa framav. Tað eru fýra hálvleikir, sigur Jens Wedeborg.

Kringvarpið sigur frá dystinum í útvarpinum.