Badminton í fýra finalum fríggjadagin

Badmintonliðið hjá Føroyum spældi seg í ikki minni enn fýra finalur eftir innleiðandi dystir allan mikudagin.

Rúni Øster og Miriam í Grótinum skulu spæla finalurnar í einmansleiki. Tvídysturin ímillum Føroyar og Grønland heldur fram, tí í kvinnufinaluni hittir Miriam í Grótinum Saru Jacobsen, meðan Rúni Øster skal royna seg ímóti Toke Driefter í mansfinaluni; bæði úr Grønlandi.

Í tvímansleiki við monnum fingu Magnus Dal-Christiansen og Rúni Øster revansju fyri tapið í avgerandi finaludystinum í liðkappingini, tá teir vunnu 2-1 á Grønlandi í hálvfinalunum. Teir møta einum pari úr Guernsey í finaluni.

Í tvímansleiki hjá kvinnum var nær við, at tað gjørdist ein rein føroyafinala. Miriam í Grótinum og Bjarnhild í Buð Justinussen høvdu ongar trupulleikar í síni hálvfinalu, men tað endaði við vónbroti hjá tvíburðasystrunum Sáru og Miu Thorkildshøj, sum taptu 2-1 eftir at tær mistu trygga leiðslu í avgerandi settinum.

Finalumótstøðan hjá Miriam í Grótinum og Bjarnhild í Buð Justinussen verður ístaðin úr Isle of Man. Finalurnar vera fríggjadagin.