Manningarfeløg lýsa tænastubann á Galaxy

Føroya Skipara- og Navigatørfelag og Maskinmeistarafelagið lýsa nú tænastubann fyri limir sínar, sum skulu sigla við Galaxy, tá skipið skal avloysa Smyril, tá hann fer í dokk um ein mánað.

Tað boða feløgini frá í almennum skrivi seinnapartin, og í brævinum stendur eisini, at ITF, International Transport-workers Federation, sum er altjóða samgongan av fakfeløgum, hvørs limir arbeiða í flutningsvinnuni, eisini hevur fingið boðini.

Føroya Skipara- og Navigatørfelag og Maskinmeistarafelagið góðtaka ikki, at aðrar lønartreytir skulu galda fyri teirra limir umborð á avloysaraskipinum enn tær, sum eru galdandi fyri Smyril í sáttmálanum fyri SSL.

- At Smyril má í dokk er sín søk, men vit fara undir ongum umstøðum at góðtaka, at Strandferðslan og Fíggjarmálaráðið gera sær dælt av støðuni við at dumpa lønirnar á avloysaraskipinum. Ongin sáttmáli ella sáttmálalíknandi avtala er gjørd fyri yvirmenninar á Galaxy, meðan skipið skal avloysa Smyril. Og tí nokta vit okkara limum at gera tænastu umborð á skipinum. Hesum hava vit í dag boðað Strandferðsluni og Fíggjarmálaráðnum frá, sigur Annfinnur Garðalíð, formaður í Føroya Skipara- og Navigatørfelag.

Sambært feløgunum er ætlanin hjá Strandferðsluni, at tveir skiparar, tveir stýrimenn, tveir maskinmeistarar og átta dekkarar skulu vera føroyski parturin av manningini á Galaxy. Restin av manningini eru útlendingar.

- Sjálvandi kunnu vit ikki góðtaka lønardumping. Vit kunnu bara lýsa tænastubann fyri okkara limir, men vit finna okkum tó heldur als ikki í, at útlendska manningin skal sigla undir verri sáttmálatreytum enn teimum, sum galda fyri Smyril, og tí boða vit eisini ITF frá støðuni, sigur Arnfinn Bech, formaður í Maskinmeistarafelagnum.

Smyril fer í dokk 23. august og átta vikur fram.