Sea Shepherd: Vit mæla ikki til at boykotta oyggjaleikirnar í Føroyum

(Dagføring kl. 16:35)

Isle of Man Today skrivar í dag, at Sea Shepherd heitir á Isle of Man og aðrar tjóðir um at boykotta oyggjaleikirnar í Føroyum í 2027, tí føroyingar drepa grind. 

Altjóða oyggjaleikanevndin vísir atfinningum aftur og sigur, at oyggjaleikir eru ætlaðir at skapa vinaløg gjøgnum ítrótt, og ikki blanda politikk upp í leikirnar. 

Felagsskapurin hevur sent teldupostskabelónir til sínar stuðlar, so tey kunnu leggja trýst á oyggjaleikanevndina, og heitir eisini á ítróttafólk og ítróttasambond um at tala ímóti grindadrápi, og at fólk eisini seta seg beinleiðis í samband við føroysku stjórnina.

Men í skrivi til Kringvarpið, skrivar Valentina Crast, átaksleiðari í Sea Shepherd, at felagsskapurin stuðlar friðarligum átøkum, sum hava til endamáls at skapa uppmerksemi
viðvíkjandi grindadrápi, men at Sea Shepherd ikki stendur á odda fyri hesum ávísa átakinum.

Hon vónar, at hetta átakið fer at skapa kjak og hugleiðingar um týdningin av altjóða felagsskapum – og hvussu grindadráp aftur og aftur er við til at skapa avbjóðingar fyri júst hesum.

"Vit eru vitandi um, at eitt uppslag á sosialu miðlunum ikki greitt vísir á, hvør stendur aftanfyri áheitanina um boykott, og sum síðan er rættað.

Sea Shepherd fer ikki at standa á odda fyri nøkrum átøkum at útihýsa føroyskum ítróttarfólkum frá at taka lut í nøkrum ítróttartiltaki", skrivar Valentina Crast, átaksleiðari í Sea Shepherd.