80 ár síðan kjarnorkubumbuna í Hiroshima

Í dag eru áttati ár liðin, síðani ein kjarnorkubumba varð slept yvir japanska býin Hiroshima undir seinna heimsbardaga.

Bumbuálopið á Hiroshima varð mint við einum hátíðarhaldi í býnum í morgun, har umboð úr nógvum londum tóku lut, skrivar AP. 

Borgarstjórin í Hiroshima heitti á stjórnir kring heimin um at læra av álopinum á býin, og segði, at menning og goymsla av kjarnorkuvápnum fer at fáa álvarsligar avleiðingar.

Amerikansku atombumburnar, sum vórðu sleptar yvir Hiroshimaj tann 6. august í 1945, og yvir Nagasaki tríggjar dagar seinni, eru einastu kjarnorkuálop, sum nakrantíð eru framd. 

Umleið 78.000 fólk doyðu beinanvegin í Hiroshima, men við árslok í 1945 vóru tilsamans 140.000 fólk deyð orsakað av spreingingini.

Í Nagasaki doyðu fleiri enn 27.000 fólk, tá kjarnorkubumban varð slept yvir býin, og við árslok í 1945 vóru tilsamans umleið 70.000 fólk deyð orsakað av kjarnorkubumbuni. 

Sambært japansku myndugleikum doyðu yvir hálv millión fólk orsakað av álopunum á Hiroshima og Nagasaki; antin í sjálvari spreingingini av bumbunum ella seinni av skaðum ella sjúkum orsakað av geisling. 

Japan yvirgav seg tann 15. august í 1945.