Sleikja sárini eftir miseydnaða íløgu í Globe Tracker

Norðoya Íløgufelag sleikir sárini eftir miseydnaða íløgu í felagið Globe Tracker.

- Tá partapeningurin í felagnum varð niðurskrivaður til null, og biðið varð um nýggjan kapital, valdu vit at takka fyri okkum, sigur Eyðfinn Olsen, stjóri í Norðoya Íløgufelag.

Í umleið 10 ár hevur Norðoya Íløgufelag - ið er felag undir Føroyagrunninum í Klaksvík - átt í felagnum Globe Tracker.

Globe Tracker er upprunaliga eitt føroyskt felag, sum skal menna útgerð til at hava yvirlit og eftirlit við bingjum, ið ferðast á heimshøvunum. 

Joel undir Leitinum

Joel undir Leitinum er stjóri í Globe Tracker ApS. (Mynd: Globe Tracker)

74 milliónir í halli í fjør

30.desember í fjør verður allur kapitalurin í Globe Tracker niðurskrivaður til null.

Sambært 2024-roknskapinum hjá Globe Tracker ApS, skrásett í Danmark og nú høvuðsfelag í samtakinum, er talan um 34,7 milliónir dollarar - svarandi til 222 milliónir krónur - nú staðfestur at vera null krónur verdur.

Tað hendir eftir enn eitt ár við blóðreyðum roknskapartølum við 74 milliónum í halli fyri 2024.

Fyri nøkrum árum síðani fóru Arbeiðsmarknaðareftirlønargrunnurin, Smyril Line og Tryggingarfelagið Føroyar, sum nú eitur Betri, burturúr.

Framherji

Reiðaríið Framherji í Fuglafirði og tvey feløg í LÍV-samtakinum eiga framvegis í Globe Tracker ApS.

Tveir eigarar eftir

Eftir niðurskrivingina 30. desember eru nú bara tveir eigarar eftir í Globe Tracker ApS. Tey eru reiðaríið Framherji í Fuglafirði, sum eigur beint oman fyri 50 prosent av felagnum, og so tvey feløg í LÍV-samtakinum - P/F Tryggingarfelagið LÍV og P/F LÍV, lívs- og pensjónstryggingarfelag - sum eiga tilsamans beint undir 50 prosent av felagnum.

Sambært donsku vinnuskránni er partapeningurin í felagnum nú 66,7 milliónir krónur. 

Hoyr innslag í útvarpstíðindunum: