Ikki ráðiligt at gera Eirargarð til lestraríbúðir

Í hoyringssvari til uppskotið, sum var lagt fram í Løgtinginum í dag, sigur Umhvørvisstovan, at tey meta ikki, at tað er ráðiligt at samtykkja eitt lógaruppskot, hvørs endamál partvís er at seta verandi tinglýsingar- og matrikkullóggávu úr gildi spesifikt í mun til ein bygning í hesum føri Eirargarður 2 í Tórshavn.

Tað er Margit Stórá, landsstýriskvinna í bústaðarmálum, sum hevur lagt uppskotið fram at lata Eirargarð til Húsalánsgrunnin til at byggja lestraríbúðir.

Umhvørvisstovan sigur eisini, at sambært tinglýsingarlógini ber tað ei heldur til at stovna bygningin Eirargarður 2 sum ein bygning á leigaðum øki við tað, at ognin longu er ein samlaður fastur eigindómur.

Sum er, húsast Sjúkraflutningstænastan undir Sjúkrahúsverkinum á niðastu hædd í Eirargarði 2. 

Sjúkrahúsið viðmerkir í hoyringssvari, at hædd má takast fyri sjúkraflutningstænastuni, sum skal halda fram at húsast á niðastu hædd.

Neyðugt er, at sjúkraflutningsakfør kunnu brúka innkoyringina frá Eirargarði inn á Eirargarð 2, umframt at sjúkraflutningstænastan hevur ræði á økinum millum høga bygningin á Eirargarði 2 og tann lægra bygningin , sum er garagan.

Tey vísa eisini á, at tað verður neyðugt við fleiri parkeringsplássum, um bygningurin skal gerast til lestraríbúðir, tí longu nú er tað tørvur á fleiri parkeringsplássum.

Bygningurin á Eirargarði verður mettur til 50 milliónir krónur, sigur Fíggjarmálaráðið. Bygningurin verður latin Húsalánsgrunninum sum stuðul til mettu keypsupphæddina.

Í hoyringssvari sigur Bústaðir, tað er relevant at hugsa um skattskylduna av gávuni.

Heilsumálaráðið, Almanna-og mentamálaráðið, Heilsustýrið og Javnstøðunevndin húsast á Eiragarði 2, og flyta tí í leigað høli og høli hjá landinum í Tinganesi í heyst.

Almanna- og mentamálaraðið hevur samráðingar um at yvirtaka leigumálið hjá Arbeiðs- og brunaeftirlitinum og tunnilsfelagnum á Bryggjubakka.

28. august verður fyrsta viðgerð av uppskotinum.

Hoyr innslag í útvarpstíðindunum í kvøld: