Hákun og teir løgdu fyri við sigri

Hákun West av Teigum skeyt trý mál, tá Füchse Berlin vann 39-27 á uppflytaranum Bergischer HC í fyrsta landskappingardystinum hjá meistarunum í ár.

Føroyski vongurin, sum skoraði upp á allar sínar skotroyndir, skeyt høvuðsstaðarfelagið í gongd í fyrsta minutti, og legði tvey mál afturat ímóti endanum av dystinum, sum leingi var javnari, enn endaliga úrslitið ber boð um.

Hálvleikstøðan var 20-17, og tá 38 minuttir vóru spældir var javnt 23-23. Eftir hetta skrædnaði, og Füchse Berlin drønaði avstað við Mathiasi Gidsel á odda.

Elias og Kiel vunnu tepurt

Elias Ellefsen á Skipagøtu og Kiel fingu eisini tvey stig í sínum fyrsta bundesligadysti hetta kappingarárið, men tað stóð eitt sindur á á útivølli ímóti Erlangen.

Føroyski spælskiparin spældi nógv, skoraði seks mál og legði upp til tvey í dystinum, sum Kiel vann 31-29.

Mikukvøldið tapti Hannover-Burgdorf við Vilhelmi Poulsen á liðnum 29-26 fyri Gummersbach á heimavølli.

Óli kanónbyrjan

Óli Mittún kom væl frá byrjan í bestu donsku hondbóltsdeildini, tá GOG vann á tapandi DM-finalistunum í fjør, Skjern. Føroyska stjørnuskotið skeyt fimm mál og var við í øllum tí góða, sum fjónliðið skapti í álopinum.

Ferð eftir ferð skapti fótfimi bakspælarin pláss til liðfelagarnar í dystinum, sum GOG vann 31-27. Óli Mittún fekk nógv rós fyri sítt avrik; einasta minusi vóru mongu brendu skotini hjá hoyvíkinginum.