Galaxy sigldi við opnum hekkuportri

Tá Galaxy sigldi av Havnini suður á Krambatanga mánakvøldið 1. september, var tað við opnum hekkuportri. Nakað, sum bæði er ólógligt og vandamikið.

Kringvarpið hevur eina mynd, sum er tikin á biladekkinum á Galaxy klokkan 19.36 hetta kvøldið, sum greitt vísir, at portrið er opið.

1000013264.jpg

Altjóða reglur siga, at ferjur av slíkum slag ikki hava loyvi til at loysa og fara frá bryggju, fyrr enn portrið er afturlatið, skalkað og stongt. Hesar reglur verða nevndar SOLAS, og eru eisini galdandi í Føroyum.

Var á opnum havi
Kringvarpið hevur kannað myndina og hevur fingið váttað, at myndin er røtt. Sokallað metadata í myndini vísa, at hon er tikin 1. september í ár klokkan 19.36.

Vikmar, sum hevur útgerð at finna knattstøðuna hjá skipum - eisini aftur í tíð, hevur kannað, hvar Galaxy var statt júst tá myndin varð tikin. Sambært teirra upplýsingum, so var skipið tá beint eystan fyri Lítlu Dímun.

vikmargalaxy.png

Kannað í dag
Skipaeftirlitið hevur í sambandi við áheitan frá Kringvarpinum kannað viðurskiftini umborð á Galaxy, tá skipið fór av Krambatanga klokkan 14 í dag. Tá var alt í lagi við hekkuportrinum.

Á middegi hendan 1. september, fekst hekkuportið ikki upp, og tí sluppu fólk ikki í land á Krambatanga. Og tað var hetta kvøldið, at skipið sigldi við opnum portri.

Jón Helmsdal er skipsførari og undirvísingarleiðari fyri navigatørar á Sjómansskúlanum. 

Hann sigur, at hann hevði ikki loyst frá landi undir slíkum umstøðum.

Meira um málið í útvarpinum og í Degi og viku í kvøld.