Nú kemur regluverkið um landsins pengar

Uppskot er nú gjørt um fíggjarpolitiskt regluverk og sent til hoyringar.

Fíggjarmálaráðið sigur, at endamálið við uppskotinum er at seta hámark fyri, hvussu nógv útreiðslurnar hjá landinum til rakstur kunnu vera. 

Haraftrat er uppskotið um løgujáttanir og løgukendar játtanir hjá landinum.

Tær skulu vera í samsvari við løguætlan, sum løgtingið hevur samtykt. 

Uppskotið er ikki enn um alt tað almenna, tí kommunurnar eru ikki við. 

Í fyrstu atløgu er ætlanin at fáa fyriskipanirnar at virka hjá landinum. 

Arbeitt verður víðari við, hvussu og nær alt tað almenna kann vera við, sigur Fíggjarmálaráðið.

Sambært uppskotinum kann fíggjarlógin ikki hava rakstrarútreiðslur, sum eru meira enn eitt prosent størri enn rakstrarútreiðslurnar undanfarna ár, framskrivaðar við lønar- og prísvøkstri.

Tað stendur í samgonguskjalinum frá 2022, at slíkt regluverk skal gerast.

Og Búskaparráðið mælir til at gera fíggjarpolitiskt regluverk.