Fráflytingarmynstrið framvegis tað sama

Hóast tølini sýnast at minka, so er føroyska fráflytingarmynstrið yvirskipað enn tað sama. Tað merkir, at vit framvegis missa fimtahvønn av hvørjum árgangi, sigur Erla Thorsteinsson.

Broytingin er sostatt, at árgangirnir eru minni, meðan mynstrið ikki er broytt -  heldur ikki, tá talan er um kyn, greiðir hagfrøðingurin á Hagstovuni frá. Tá sipar hon til, at vit hava eitt søguligt undirskot av kvinnum í Føroyum. 

- Ein øgiliga stórur partur av tí undirskotinum eru fólk millum 20 og 35 ár. Tá eru tað faktiskt 122 menn fyri hvørja 100 kvinnur í Føroyum.  Tað greiddi Erla Thorsteinsson frá í sambandi við ráðstevnu í Smæruni í Havn um fráflyting og kyn, sum Javnstøðunevndin skipaði fyri í gjár. 

Hoyr innslag í útvarpstíðindunum: 

Um vit vilja loysa avbjóðingina við fráflyting, so eru kanska góð ráð at heita úr grannatjóðini. Hyggja vit til dømis eftir Íslandi, so er ein broyting farin fram, vísir Erla Thorsteinsson á. 

Í Íslandi missa tey tíggjunda hvønn, men tey plagdu at liggja sama stað, sum vit gera í Føroyum, sigur hagfrøðingurin. - So tað kann vísa okkum í Føroyum, at tað ber til at venda gongdini, endar Erla Thorsteinsson.