Elias heldur fram við stórspælinum

Elias Ellefsen á Skipagøtu var aftur í miðdeplinum, tá THW Kiel vann á Leipzig og tók oddasessin í Bundesliguni.

Føroyingurin skeyt átta mál og legði upp til onnur átta í 41-34 sigrinum í Sachsen, og telist millum heitastu spælararnar í Týsklandi í løtuni. 

Sum vera man komu flestu málini úr seks metrum ella eftir gjøgnumbrot, meðan nógv av uppleggunum komu strikuni Lukas Laube til góðar. Hann skeyt tíggju mál í dystinum.

Kiel hevur nú 10 stig og er fremst í landskappingini eitt stig frammanfyri Magdeburg, sum heldur óvæntað bert fekk javnleiki ímóti Erlangen leygardagin.

Hákun og Vilhelm vunnu eisini

Meistaraliðið Füchse Berlin við Hákuni West av Teigum tykist hava fótað sær aftur eftir venjaraskiftið fyri kortum. Føroyski vongurin skeyt tvey mál upp á tvær royndir, tá Melsungen vitjaði í Berlin.

Füchse Berlin vann 30-24 og kom upp á seks stig eftir fimm spæld umfør.

Triði føroyingurin í bestu týsku deildini spældi eisini ein góðan dyst sunnudagin. Vilhelm Poulsen skeyt fimm mál, tá Hannover-Burgdorf vann 28-24 á Rhein Neckar Löwen og vann seg upp á 13. pláss við fýra stigum.