Akta ikki boðini í Gasa - fimm palestinar eru skotnir

Ísraelski herurin (IDF) sigur, at fleiri royndir eru gjørdar at fara um 'gulu strikuna', og tað er brot á friðaravtaluna, skrivar ísraelski herurin á Telegram í morgun, sambært Reuters.

'Gula strikan' er eitt mark í sambandi við fyrstu afturtøkuna í friðarætlanini fyri Gasa.

Í fráboðan frá IDF verður heitt á íbúgvar í Gasa um at akta boðini og ikki nærkast herdeildunum, sum eru sendar til økið.

IDF skeyt eftir fólkunum, og fimm palestinar hava latið lív, sambært IDF, skrivar The Times of Israel.

Halda fram at nærkast

- Roynt varð at halda fólkunum burtur. Tey aktaðu ikki boðini og hildu fram at nærkast hermonnunum, sum eru sendir út í øki skrivar IDF á Telegram.

Ein talsmaður fyri Hamas sigur við palestinsku tíðindastovuna Shehab, at fleiri íbúgvar í Gazageiranum hava latið lív í skotbardøgum.

- Vit heita aftur á allar partar um at fylgja væl við atgerðunum hjá hersetingarvaldinum og tryggja, at tað ikki skákar sær undan sínum skyldum mótvegis meklarunum, tá tað snýr seg um at fáa enda á krígnum í Gaza, sigur Hazem Qassem við tíðindastovuna.

Bløðini Times of Israel og Al Jazeera skriva, at fimm palestinar hava latið lív.