Trolarar skulu sleppa at brúka tvítrol

Vit eiga at loyva føroyskum trolarum at brúka tvítrol, heldur Jørgen Niclasen, tingmaður.

Hann hevur uppskot til samtyktar um tað.

Hann sigur, at í meira enn trý ár hevur partur av trolaraflotanum, sum fiskar undir Føroyum, trýst á fyri at fáa loyvi at brúka tvítrol. 

Jørgen Niclasen sigur, at sambært Havstovuni fiskar tvítrol millum 70 og 80 prosent meira enn lemmatrol.

Og skipini brúka 27 prosent minni olju fyri hvørt fiskað kilo av svartkalva við tvítroli enn við lemmatroli. 

Oljunýtslan á toskaveiðu á Íslandsrygginum var 16 prosent minni fyri hvørt fiskað kilo.  

Havstovan kom í apríl við frágreiðing.  

Einki komið úr landsstýrinum 

Í september í fjør segði táverandi landsstýrimaðurin í fiskivinnumálum við løgtingið, at tá frágreiðing frá royndini í fjør vetur var komin, var avgerð tikin.  

Frágreiðingin kom frá reiðarínum 12. februar í ár, sigur Jørgen Niclasen. 

Men enn er einki komið úr landsstýrinum.

Fyri at hava somu fiskiorku undir Føroyum er neyðugt at regulera fiskidagarnar, stendur í uppskotinum til samtyktar. 

Ein fiskidagur við tvítroli skal telja tilsvarandi meira enn ein fiskidagur við lemmatroli ella partroli.