Setrið fer at bjóða fleiri diplomútbúgvingar

Fróðskaparsetrið fær skjótt møguleikan at veita størri útbúgvingar, enn nú ber til.

Tað ger ein lógarbroyting, sum er á veg.

Uppskotið um lógarbroytingina er sent til hoyringar.

Talan er um diplomútbúgvingar, sum eru størri enn galdandi lóg loyvir. Tí er ikki loyvt at veita tær í dag.

Eisini skulu ásetingarnar um diplomútbúgvingar gerast greiðari.

Sprottið úr námsfrøðini

Ítøkiliga er uppskotið sprottið úr einari diplomútbúgving í námsfrøði, sum gevur lesandi fakligar førleikar at virka á námsfrøðiliga økinum, hóast talan ikki er um fullar bachelorútbúgvingar. 

Fyri at kunna veita tann fakliga førleikan, er brúk fyri at gera vavið á diplomútbúgvingunum breiðari, so hesin fakligi førleikin verður tryggjaður, sigur landsstýrið. 

Samstundis verður arbeitt við einari eftirútbúgvingarskipan fyri fólkaskúlalærarar, og skipa tær sum masterdiplomútbúgvingar.

Masterdiplomútbúgvingar verður heitið á diplomútbúgvingum á masterstigi.