Bara grindalógin skal galda fyri grindadráp

Nakrir tingmenn, bæði í samgongu og í andstøðu, lata ikki orðini hjá Jóhan Christiansen, fyrrverandi landsstýrismanni, fara aftur við borðinum.

Hann segði fyrr í vikuni, at verður niðurstøðan hjá dómsvaldinum, at lógin um djóravælferð gongur fram um grindalógina, er vert at umhugsa at broyta lógina um djóravælferð, so tað verður greitt, at hon ikki er galdandi fyri grindadráp.

Tað segði hann í sambandi við, at sýslumaður og grindamenn eru skuldsettir fyri at bróta lógina um djóravælferð í einum grindadrápi í Hvannasundi í summar.

Nú hava Jacob Vestergaard, Høgni Hoydal, Jóhannis Joensen, Bárður á Steig Nielsen, Karlot Hergeirsson og Steffan Klein Poulsen uppskot til samtyktar, sum teir kalla at verja rættin at veiða villini djór.

Teir biðja landsstýrið broyta lóggávuna soleiðis, at bara grindalógin er galdandi fyri grindadráp.

Brot skulu viðgerast sambært grindalógini, siga tingmenninir.

Les uppskotið her.