Sleppur ikki undan kirkjuskatti

Tá fólk melda seg úr fólkakirkjuni, ræður um at boða Taks frá. Tí annars sleppa fólk ikki undan kirkjuskatti.

Tað noyðist ein skattaborgari at ásanna, nú Kærustovnurin hevur staðfest eina avgerð hjá Taks.

Kært vart um, at Taks ikki tók upp aftur skattauppgerðirnar fyri árini frá 2004 til 2021, tá kærarin rindaði kirkjuskatt, hóast hann sigur seg hava meldað seg úr fólkakirkjuni í 2004.

Freistin fyri uppafturtøku er farin, hon er trý ár.Tí verður kirkjuskatturin í 2022, 2023 og 2024 goldin aftur.

Fekk fráboðanina í apríl

Taks sigur seg ikki hava fingið fráboðan um, at kærarin ikki er limur í fólkakirkjuni, fyrr enn í apríl í ár. 

Kærustovnurin vísir eisini á, at í skattauppgerðini er teigur, sum eitur kirkjuskattur. 

Tað sæst tí týðiliga í skattauppgerðini, at kirkjuskattur er goldin.

Kærustovnurin sigur, at fólk eiga sjálvi at ansa eftir, at skattauppgerðin er røtt, og gera Taks vart við, um hon er skeiv.