Evropa slær manngarð um Grønland

Evropa slær nú manngarð um Grønland.

Tað gera fleiri av stóru londunum í Evropa greitt í felags yvirlýsing fyrrapartin.

Í yvirlýsingini stendur, at trygdin í Arktis hevur hægstu raðfesting fyri Evropa, og hon er avgerandi fyri altjóða og trans-atlantisku trygdina.

Víst verður á, at hetta samsvarar við raðfestingarnar hjá verjusamgonguni NATO, og evropeisku londini eru longu farin at raðfesta Arktis.

Í felags yvirlýsingini frá Fraklandi, Týsklandi, Italia, Póllandi, Stórabretlandi, Danmark og Grønlandi, stendur soleiðis:

- Vit, eins og nógv av okkara sameindu, eru meira sjónlig í Arktis, og vit hava gjørt stórar íløgur fyri tryggja og verja Arktis. Kongsríkið Danmark, íroknað Grønland, er partur av NATO. Trygdin í Arktis skal tí fremjast í felagsskapi, í samstarvi millum NATO-lond, eisini USA. Tað skal gerast við støði í prinsippunum hjá ST um suverenitet, territorialan integritet og treytaleysari virðing fyri landamørkum. Hetta eru altjóða prinsipp, sum vit altíð vilja verja. 

Avgerandi samstarvsfelagi

Í felags yvirlýsingini vísa evropeisku londini eisini á leiklutin hjá USA.

- USA er ein avgerandi samstarvsfelagi í hesum átaki, bæði sum NATO-sameindi og gjøgnum verjuavtaluna millum Danmark og USA frá 1951. 

Yvirlýsingin endar við hesum orðum:

- Grønland hoyrir til grønlendska fólkið. Tað eru Danmark og Grønland - og bara tey - sum eiga avgerðina í málum um Danmark og Grønland.

Ríkis- og stjórnarleiðararnir í evropeisku londunum hava skrivað undir felags yvirlýsingina, sum er almannakunngjørd fyrrapartin.