Føroyskur landsliðspælari seldur til Norra

Føroyski landsliðsmálverjin, 26 ára gamli Mattias Heðinsson Lamhauge, verður í næstum seldur til norska Strømsgodset. Havnarmaðurin hevur ikki vilja gjørt nýggjan sáttmála við FC Fredericia, og verður nú seldur til Strømsgodset, sum spælir í næstbestu deildini í Norra.

Tað hevur verið nakað av órógvi kring Mattias H. Lamhauge og støðuna hjá honum í FC Fredericia. Hann misti plássið í fjør og venjarin gav tekin um, at hann iki stólaði upp á Mattias, men tað var stór ónøgd við avloysaran hjá honum. Føroyski landsliðsmálverjin megnaði at vinna sær plássið aftur, men hevur ikki sýnt áhuga í at leingja sáttmálan, sum var galdandi fram til í summar.

Strømsgodset hevur keypt Mattias H. Lamhauge leysan av sáttmálanum. Málverjin skal í morgin til læknakanning. Havnarmaðurin er uppvaksin í HB og fekk sítt gjøgnumbrot hjá grannunum B36. Í januar 2024 fór hann til FC Fredericia.

Ongin føroyingur hevur spælt, ella spælir, við Strømsgodset, men í venjaratoyminum er eitt kent navn. Tað er fyrrverandi venjarin hjá KÍ, Magne Hoseth. Ítróttarstjóri er Jackie Rasmussen. Hann hevur í fleiri førum gjørt sáttmálar við føroyskar spælarar, tá hann var ítróttarstjóri í Hillerød. Strømsgodset flutti í fjør niður í næstbestu deildina, men málið er at flyta upp aftur í bestu deildina.