Trivnaðarkanning almannakunngjørd í morgin

Ein nýggj kanning, sum Starvsfelagið almannakunnger í morgin, vísir, at happing og strongd framvegis eru stórir trupulleikar á almenna arbeiðsmarknaðinum – hóast lítil bati sæst samanborið við undanfarin ár.

Kanningin er ein uppfylging av strongdarkanningini frá 2014 og happingarkanningini frá 2023.

Sambært formanninum í Starvsfelagnum, Súna Selfoss, er talið av teimum, sum uppliva happing, lækkað úr 20 niður í 16 prosent.

- Tølini eru tó framvegis alt ov høg, heldur Súni Selfoss.

Happingin fevnir um fleiri sløg, eitt nú útihýsan, niðurgering og happing grundað á kyn og aldur. Kanningin vísir eisini, at happing ofta fer fram millum starvsfólk, men at bæði nærmasta og ovasta leiðsla eisini eru partur av trupulleikanum – nakað, sum Starvsfelagið kallar alarmerandi.

Tá tað snýr seg um strongd, eru tølini eitt sindur betri enn áður, men arbeiðið er framvegis høvuðsorsøkin. Ov stór arbeiðsbyrða, ov nógv arbeiði og trupulleikar við at leggja arbeiðið frá sær eru høvuðsorsøkirnar.

Starvsfelagið heitir á arbeiðsgevarar og leiðslur um at taka trupulleikan í størsta álvara, betra arbeiðsumhvørvið og tryggja, at starvsfólk kunnu fara trygt og nøgd til og frá arbeiði.

Kanningin verður løgd fram fyri sáttmálapørtum, leiðslum og álitisfólkum í Lívdini í morgin klokkan 13.

Hoyr innslag í útvarpstíðindunum á nátturða her: