Olaf til norskan fótbólt

Olaf Bárðarson hevur gjørt sáttmála við norska Sandnes Ulf. 22 ára gamli vongurin hevur spælt við Víkingi øll árini í føroyskum fótbólti, men hevur nú valt at royna nýggjar leiðir. Hann var í fjør í Slovakia og samráddist við FK Železiarne Podbrezová, men skifti datt nirðurfyri í evstu løtu.

Tá valdi Olaf Bárðarson at halda fram í Víkingi, men nú hevur hann tikið stigið at royna seg í útlendskum fótbólti. Hjá Víkingi hevur hann spælt á vinstra vongi. Vørumerkið hjá honum hevur verið dribblingarnar inn í vøllin og skotini við høgra beini.

Sandnes Ulf er ikki ókent í Føroyum. Felagið hevur Gullbrand Øregaard í hópinum, og Ári Mohr Jónsson hevur spælt har í tíðarskeiðnum 2018 til 2021. Fyri kortum bleiv føroyski landsliðsmálmaðurin, Mattias H. Lamhauge, seldur til Strømsgodset, ið eisini spælir í næstbestu deildini í Norra.

- Tað er eingin loyna, at vit høvdu ynskt at longt við Olaf, men vit fegnast sjálvsagt hansara vegna, og ynskja honum alt tað besta í hesum nýggja ævintýrinum. Tillukku Olaf, og minst til at dyrnar altíð eru opnar í Sarpugerði, um tú einaferð vendir heimaftur, skrivar Víkingur á Facebook.

Tað bleiv sambært Faroesoccer til 124 dystir og 36 mál í landskappingini fyri Víkingi á hesum sinni. Olaf Bárðarson verður nummar sjey hjá Sandnes Ulf.